ലോകത്തെയാകെ ഞെട്ടിച്ചുകൊണ്ട്, പ്രമുഖ ടിക്കറ്റിംഗ് പ്ലാറ്റ്‌ഫോമായ ടിക്കറ്റ് മാസ്റ്ററിൽ (Ticketmaster) നിന്ന് ഉപയോക്താക്കളുടെ വൻതോതിലുള്ള വിവരങ്ങൾ ചോർന്നു. ഏകദേശം 56 കോടി ഉപയോക്താക്കളുടെ പേര്, വിലാസം, ഇ-മെയിൽ, ഫോൺ നമ്പർ, ടിക്കറ്റ് ഓർഡർ വിവരങ്ങൾ, ക്രെഡിറ്റ് കാർഡ് നമ്പറിന്റെ അവസാന നാല് അക്കങ്ങൾ എന്നിവയടങ്ങുന്ന ഡാറ്റയാണ് ഹാക്കർമാർ കൈക്കലാക്കിയത്. ‘ShinyHunters’ എന്ന കുപ്രസിദ്ധ ഹാക്കിംഗ് സംഘം ഈ ചോർച്ചയുടെ ഉത്തരവാദിത്വം ഏറ്റെടുത്തിട്ടുണ്ട്.
1.3 ടെറാബൈറ്റ് (TB) വലുപ്പമുള്ള ഈ ഡാറ്റ, 5 ലക്ഷം യുഎസ് ഡോളറിന് (ഏകദേശം 4 കോടിയിലധികം ഇന്ത്യൻ രൂപ) ഡാർക്ക് വെബ് ഫോറത്തിൽ ഒറ്റത്തവണ വിൽപ്പനയ്ക്ക് വെച്ചിരിക്കുകയാണ് ഹാക്കർമാർ. ക്ലൗഡ് ഡാറ്റാ പ്ലാറ്റ്‌ഫോമായ സ്നോഫ്ലേക്കിലെ (Snowflake) ഒരു സുരക്ഷാ വീഴ്ച മുതലെടുത്താണ് ഈ ഡാറ്റ ചോർത്തിയതെന്നാണ് പ്രാഥമിക നിഗമനം. ടിക്കറ്റ് മാസ്റ്റർ ഉപയോക്താക്കൾ പാസ്‌വേഡുകൾ മാറ്റുവാനും, സംശയാസ്പദമായ ഇ-മെയിലുകളെയും സന്ദേശങ്ങളെയും സൂക്ഷിക്കുവാനും സൈബർ വിദഗ്ദ്ധർ മുന്നറിയിപ്പ് നൽകുന്നു.